Innvengpa

Pathian in hun hoih hon bawlsak zel in, tukum a ding a Khristian-te a ding a ni poimoh bangzah hiam – Palm Sunday, Good Friday, Easter Sunday, Missionary Day, Nute Ni – chihte i zat zoh nung un, tutung in, Tanchin Hoih Luke gelh ah Jesu in gentehna a gen “Samari Mihoih” (Luke 10:25–37) chia kigen apan in “Kua a na innvengpa?” chih saulou in ensuk ding in kisa le’ng.

Jesu kiangah daansiam khat va pai in ze-etna ding in tangtawn hinna a neih theihna ding a bang hih ding ahi hiam chih dotna va bawl hi. Jesu in daan laibu in bang gen hiam chi in leh-dot hi. Daansiampa in leng Pathian leh innvengte it ding chi in gen hi. Jesu in a dawnna dik leh huaite hih ding in gen hi. Himahleh, daansiampa bel kisiamtan sawm in “Kua a ka innvengpa ka it ding?” chi a dotna a bawl tungtawn in Jesu in “innvengpa” theihsiamna ding in gentehna gen hi.

Hiai gentehna ah mi kuahiam khat Jerusalem apat Jeriko lam zuan a pailai migiloute’ khut thuak in a puan teng suahsak in si dek mahmah in koih uhi. Hiai lampi ahihleh lampi lauhuai, migilou tamna mun hi a gen ahi. Huai hun lai in mi khat hihna theihna ding chi nih om hi; huaite ahihleh: a puansilh leh a kampau zat apan ahi. Mi khat a pau ma in leng a puansilh apan a minam hihna a gal apan theichian thei uhi. Huailou in a pau zat apan bang nam/mi hi hiam chih theih chet theih in om hi. Himahleh hiai mipa ahihleh huai teng laksak in om hi. Ahihna leh a zahhuaina laksak in om hi. Huchih lai in, siampu leh Levi-mi huai lampi tawn a paite’n tuakkha ua, gal-etthoh uhi. Levi in bel va naih a va enchian hihtuak hi. A paisanna ziak uh gen in omlou in. Bangteng hileh Juda-te’n mi kuahiam liamna thuakte panpih ding chih thugousiah leh daan in nei uhi. Huai bang ahih lai in mi buaina a buai utlou/buailouhna ding a buai khak ding lau ahih man un, a phatuamngaihna uh suah lou in lamnawl ah paisan uhi.

Huchih lai in Samari-mi, a simmoh mahmah uh leh melma bang hial a a ngaih un va tuakkha a, huai in bel phatuamngaihna suah in, a liamnate tuam in, sen a poimoh lehleng seng ngam in panla hi. Huchi in Jesu in daansiampa kiangah “Huai mi thumte lakah, suamhatte tuakpa a di’n, innvengte hi pen kua hi in na gingta a?” chi hi (Lk. 10:36). Daansiampa dawnna en thak mah dih. Samari-pa chih dia hoih lua hinapi, Samari chih leng gen utlou in, “A hehpihpa” (Lk. 10:37) chi in dawng lai hi. A dawnna dik ahi: “A hehpihpa” pen mi kuahiam khat (min leng neilou, hihna leng neilou) a ding a innvengpa ahi.

Daansiampa ngaihtuahna leh Jesu’ thugen ngaikhetute a ding in ngaihtuahna khenlam pek ah Jesu in sinsakna pia hi. Innveng chih kammal a kigen chiangin, innkiang a tenpih, chipih-sapih, lawm leh khanvualte dan a theihsiamna om khenlam ah Jesu in innvengpa chih hilhchetna chituam mahmah pia hi. Simtute a ding a kingaihtuahhuai mahmah om hi. Tangtawn hinna neih theihna ding a it ding mi nih gen a omte Pathian leh innvengpa ahi. Pathian it i kichih lai un, tuni in kua a ding in a innvengpa/nu na hi a? Min leng neilou, hihna leng neilou mite simmoh leh nelhsiah kuahiam a ding in a innvengpa/nu hi ding in Pathian in hon deih hi.

Simtute Pathian in hon vualzawl chiat hen.