I Buainate Toupa Kiangah Tun Ni

“…….Toupa, hon hondam in, mangthang ding ka kei uhiam…….” (Matt 8:25b)

Toupa Jesu a nungzuite toh tuipi tungah, long ah a tuang ua, huihpi hat tak nung in, nungzuite a patau ua, a manthat ding uh a lau mahmah uhi, a kiang ua Toupa omlou le hilou. Huihpi’n le Toupa a om a, ka subuai ngam kei chi tuan hetlou. Lei-le-van leh a sung a om tengteng bawltu, thil bangkim hihthei Pathian omna mun ah le buaina, haksat, lauhthawngna tung veve. Buaina, haksatna, mangbatna, lungngaihna-te’n le’ng tun ngam louhna nei tuanlou hih tuak hi. Setan/Diabol inle Toupa a maituah ngam ve le maw. I kiangah Toupa om in, Amah toh ton gige hi mahle hang le buainate’n hon bawm ngam lou ding ana hi hetlou hi. Tua bang hun a Toupa i pan sak zel poimoh ahi. Toupa i sam ding a, I buaina/haksatna Amah i hilh ding a, a panpihna ngen lehang, Amah naichik a om, Ama’n hon hondam in hon panpih ding a, i dam ding hi, gamlapi apan panpih dia hong kuan ding hilou ahi. Toupa Jesu nungzui Peter le’ng Toupa muang a, Amah a et sung teng tuipi tung ah khe in a pai thei a, a ginlah a, Toupa om lam phawk lou a, nuai lam a et leh tui ah tum di’n a kisa pah hi.

Khovel ah buaina, haksatna, lungkhamna tuak lou ding i omkei uhi. I haksatnate i sukveng theihlouh chiangin chimoh kisa in, khenkhatte bangin amau-le-mau kihehpih in, a hinna tanpha a su-bei sek uhi. Buaina, haksatna, mangbatna tuah hun a taina ding dik theite a suakta leh hampha himai ahi. Nungzui Juda Iskariot in a zuih Toupa mansak in, nungheisan hi. Kisik mahmah napi, taina ding tak a tai kha lou in, amah-le-mah in suk veng sawm a, a zuakna sumte bang va pekik mahleh damna mu lou in, a hinna su-bei hi. Taina ding Toupa kiangah kik leh Juda bang le’ng a zuih Toupa’n hondam mahmah ding hi, Ama’n ngaihdam theihlouh neilou hiven.

Khovel ah haksatna tuamtuam, lunglelhnate, buainate a om gige ding ahi. Huai bang i tuah hun in Pathian in hon ompih lou, panpih lou chi a lungke mai i hi hia? I Toupa nungzuite mahmah le’ng tuipi tung a long a a tuan lai un huihpi’n nuai ek a, mangbang mahmah in, mangthang ding bang hial in kingai uhi. Huai bang hun in a kiang nai mahmah uah Toupa a om hi. Amau laka Toupa Jesu om hina zenpi, buaina in a kihepmang san mai kei a, a nawk veve hi. Ei gingtute le’ng tua bang mah in Toupa i neih ziaka buaina, haksatna, mangbatna tuaklou ding a leitung a om hilou i hi. I niteng hinkhua ah haksatna i tuah ding Toupa’n phal ahi. Jesu toh ton gige hile hang le buaina i pumbelh ding chih thu omlou hi. Himahleh Ama’n i buaina su-veng thei hi, kipahhuai lua. Jesu nungzuite tua banga a mangbat lai un, buaina amau hih veng theihlouh ahi chih a thei ua, a hih veng thei om ahi chih leng a thei ua, Toupa a phawng uhi. Ei gingtute le huai bang bok in Amah toh I ton kawmkawm in buainate’n hon bawm ding a, ei hih veng theih mai dan a i koih chiangin Toupa poimohna kilang theilou hi. Huai bang hun in Toupa i sam ding a, i buaina haksatnate Amah i hilh ding hi. Nungzuite’n le’ng Toupa lam naih ua, amau hihtheihna neuchik le omlou, phetlou in, ngiat le ngiat lou in Toupa’n huihpi a dai sak mai hi.

Toupa toh i ton kawmkawm in buaina tuak ding a mansa in i om ding ua, Toupa’n hih veng thei ahi chih phawk in, Amah muanglah lou in, Amah ah muanna koih ni, ei hon panpih dia mansa gige ahi. Toupa muang lehang, Ama’n a hih vek ding hi.

Toupa Jesu panpih theih a om di’n eile kihah siangthou ni.