Toupa'n Hon Khotuah

“Jesu a kapta,” chih John 11:35 ah kigelh hi. A it Lazar a sih nung ni 4 in Lazar kivuina han ah Jesu va hoh a, va kap hi.

Jesu Pathian ahih a, denmah chiang a sihna apan Lazar kaithou ding ahihlam kithei, tua ding a kuan ahihleh bangziak a kap sese ahia? A kaihthoh dinglam theikhol khin ahihleh bang lungkhamna ding, puaknat ding om ahia, chih khawng ngaihtuahna ka nei sek hi.

“Lungkham mangbang a ka omlai in, Jesu’n kei hon awlmoh hiam?... Ka lampi mial a ka laulai in, Jesu’n kei hon awlmoh hiam?” chi in laphuakpa, Rev. Frank Graeff leng ana kidong hi. Amah Philadelphia khopi a pastor khat ahi a, mimaitai leh nuihmai gige khat hi in mite’n a thei uhi.

Polam a kilatdan huchi himahleh a sunglam ah kingaihsiatna (depression) nei in buai mahmah hi. A beidotna leh haksatnate Pathian kiang a tun in, “Jesu a Lawmhoih I Neihdan,” chih la ngaihtuah a omlai in, “Ama’n noute hon khotuah ziak in na lungzinna uh Ama’ tung ah nga un,” I Pet 5:7 chih thu tungtawn in kimuhthakna hon nei hi.

Huchi in Jesu’n kei hon awlmoh hiam? chih dotna tuh “Hon awlmoh, hon khotuah ka thei. Ka dahna hon thuakpih hi; Zan khomial leh lam haksa ah, ka Hondampa’n kei hon khotuah hi,” chih in amah-le-amah hong kidawng hi.

24.09.2025 zing ka thou a, ka lungsim ah, “Zan khomial leh lam haksa ah, ka Hondampa’n kei hon khotuah hi,” chih la, Biakna La 235na hong gingging mawk hi. Ka ngaihtuahna a omkha ngeilou la khat ahihman in, ka lungsim hon khoihdan khat om mahmah hi.

Huchia ka ngaihtuahna a paizom zellai in, a tung a kigen Lazar han kiang a Jesu’ kahna leh ka lungsim a hong lut zel ngaihtuahna ka gente toh hong kizom khat om in ka thei hi.

Jesu’n mihing ahihna a taklatna leh tua toh kizui a Pathian ahihna leng a taklat zuina chiantak in kimu hi. Pathian pen bangkim tung ah om a, hun nangawn in a kaan/gakkha kei hi. Mihingte bel hun in hon gaak a, i makhelh hiam nungkiksan mawk theikei hi. Tualaitak a, Jesu leng mihing ahihna zar in, hun in thunun a, Lazar’ sihna pen a thuak in poi a sa hi, Mari leh Martha in a puaknat bang un.

Hebru laikhak gelhtu in, “Amah ngei in khemna tuak in ana thuaktaak ziak in khemna tuakte tuh a panpih thei hi,” Heb 2:18 ana chi hi. Huchi ahih ziak mah in, lungkhamna leh puakgik leng a hon dawnzang thei hi.

Dawnzang thei chih tan kia leng ahi kei. Dawnzang nuam ahi zomah, “Semgim leh puakgik pua noute aw, na vek un ka kiang ah hong pai unla, tawlngakna ka hon pe ding,” Matt 11: 28 chi in hon na chial zomah lai hi.

“Om hen!” chih lel a leng omsak thei Pathian, bangkim hih thei, “I nget leh ngaihtuah tengteng sang a thupi zotham hih thei Pathian in” (Eph 3:20) hon khotuah hi chih tel, thupi na e maw.

Hon khotuahna bangbang na phawk a?