Report Tomkim: Sensitization/ Awareness of NDPN Working Professionals & Workshop on Discipleship
Ani & Hun: Kiginni, 30 May 2026 | Amun: EBCC Delhi Biakinn
EBC HQ in sum-le-pai, ngaihtuahna leh tha-le-zung hunkhop seng a deihsakna leh itna tawh NDPN Sensitization + Discipleship Workshop neih di a gel lak a Delhi hon telsak khak uh, kipah luat in om hi. Hiai hunzek' ngimbiikte (working professionals) tampi tel di'a deih leh lamet ahih dungzui in, heutute'n a sepkhiakna Delhi & Central Delhi saptuam TBUC khut ah nga uh. Tua dungzui in, anuai a bang in panlak ahi.
KIZAKSAKNA 1na: 12.05.2025
Sepna tuamtuam nei, suty laak ngai, bawllem (adjust) zek poimawh bang om thei. Tua bangte'n, Calendar en kawm a thumna tawh ana kithawi pat theihna di uh ngimna.
KIZAKSAKNA 2na: 19.05.2026
Resource person di heutute - Upa Dr N Thangkhansiam leh Rev Chinkhengoupau Buansing - Delhi hunzek a TOUPA'N vanglian tak a a zatna di'a na thumpih kawm a, akua-akua in, amaute theihchet seem di tupna in pulpit sermon a neihna uh YT link khat tuak koihkhiak ahi.
KIZAKSAKNA 3na: 24.05.2026
Minkhumna Google registration form, EBCC Delhi & Central Delhi’ WA group tuamtuam ah Pastor & Upate tungtawn in khahkhiak pat ahi. Online minkhum hun bikhiah (24-29 May 2026) sung in mi 108 min khum. Pastor lak a tel di'a kam a na gen, resource person (RP) Htp Thangkhansiam, Pastor-te, Ushers te leh minkhum lemtang lou ahun a hong kilang ombeh zekte tawh sim in mi 120-130 kikal lak tel in hisap theih hi.
A NI HONG TUNGTA: 30.05.2026
Pastor T Lamkhanthang in Matt 5:16 - "Na vak uh mi mitmuh di'n vak hen...' chih, simkhe zou in Hunzek honna nei hi. Aban lam teng, Pitu di'a seh, Pastor T Jambiaklal in fel leh kizen tak in hunzek honpi tou. RP, Upa Thangkhansiam in, "Sensitization & Awareness of NDPN working professionals," 1 Pet 2:10, Matt 28:19-20, Gen 1:28, Kol 3:19-20, Nas 18:3-4 leh Bible mun bangzahhiam pansan in sinsakna kichingtak pia. Ama'n EBC Missions Axiom (Mission & Service): "Hun hong tung ding ah missionary-te'n a khut ua Bible tawi nawnlou in, a nasepna uah Khrist a kengta ding uhi" chih thu tawh a sinsakna zou. Dotna & Dawnna/ Kupbeh nop neite hun in zom. Zinglam Kikhop tawp kuan, etkikna leh hun khakna, Upa T Roumuan in zang hi.
Worship Team (WT), EBCC Delhi in Zinglam in laa pi, tua hun a kisakhiate -
- K'on ompih ding
- Pakpalh zu bang ka khum lou zong
- Nuam denta ding
- Aw hon ngai ung Laukha Siangthou
Sun-an nekhawm zaizai. Ne zou kinaihkhawm nawn in, nitaklam hunzek ah, Upa Thangkhansiam in, Workshop on Discipleship - "Nungzui bawlna: Jesu Hihdan" chih thulu pansan in sinsakna kichingtak pe zom. Ama'n Bible Thutak mun bangzahhiam siksan kawm in, "Pianthakna i chih nungzui di'a kipan di'a manta, Jesu bat sawm a panlakna tawh kizom, a phakchiam bel 'Jesu bat di ahi (Luka 6:40, Rom 8:29, 12:2, Johan 1:39). Banah, NDPN or nungzuihna kichi innsung chiat ah hon pan un. Innsung a pan loupi, innsung paikan in, pisa (office) a pat hon sawm kei un. Niteng a Bible sim leh TOUPA tawh ‘dakkal khat’ bek hun zatkhawm, huan, innkuante tawh mah le dakkal khat bek hun zang in kipan phot peuhmah ni uh," chi'n paikhawmte chouna & chialna bawl hi. Dotna & Dawnna/ Kupbeh nop neite hun in zom. Nitaklam, hunzek etkikna leh hun khakna, Upa Tual Khan Siam in zang hi.
Nitaklam WT, EBCC Central Delhi' laa pi hun a laa kisakhete -
- Hon ngai ung Laukha Siangthou (Khuva bang zaidam nunneem)
- Nang Naih In
HQ apan RP di'a hong kisa heutu 2 lak ah Discipleship Coordinator (Rev. Chinkhengoupau), damlouhna ziak in hong kalsuan theilou hi. Htp Chinkhengoupau tawh hun lemtang dang zatkhawm theih di kineem in, TOUPA hon gelsak om di’a lamet ahi (Jer 29:11). Kiginni sunma leh sunnung kisinsakna, Upa Dr. Thangkhansiam in Kha Siangthou ompihna tawh la suak in, Nipini Kikhop zong 10.00 AM "EBCC Delhi ah"; leh 2.00 PM, "EBCC Central Delhi" ah hunpi/ Thugenna zang tuak. Tua hun a Upa Thangkhansiam thugen ngaihtheihna link, report tawpna ah.
Hiai NDPN Delhi vaisaina ah Ushering & Hospitality, Bial 1na sunga om Upa & Tual Upa (mi 7) te'n fel leh kizentak in seemkhia uh [Tutna, a vual masa lam apan luahdim a hihna di'a, kikhiang thrap a Upate’ panlakna phatthamching hi]. Media Team in hun zatnate video coverage bawl. Nuam.
NDPN Kisinsakna Ka-sawn: Nisim 28/05 pen 'Gazetted Holiday' hi kha, NDPN Coordinator, hiai ni Delhi ah omta, a' lunggulh khat - Nursing professional te tawh hun zatkhawm di, hun tomkha sung in sepkhiak ahi. Ahi, Nitaklam dak 4.00 PM apan neih hive’n, hiai - Nurse-te tawh houlimna & thakipiakna – hun ah EBCC Delhi & Central Delhi akipan leh Paite pau thei a lunglut Nurse hunkhop paikhawm in tha ngah chiat lai uhi. TOUPA”N thupina tang hen!
Phualpi lam heutute'n NDPN vai kisinsakna paitou zel tawh kisai lampi zuih di (roadmap) a gel uh, heutupa Siam in hon gen khak, hoih litlet in navakhuai e. Simtute'n mimal & innkuan thumna a i na phawk/ tuam di un anuai ah taklang hang -
(A) May 2026
Sensitisation & Awareness of working professionals
(B) Nov 2026
Orientation & Workshop for working professionals
(C) Feb/ March 2027
Training & Commissioning of working professionals, as Vaikuan
(D) Continuous engagement
Yearly "Leadership Training"
Phualpi lam heutute’n mukholhna kichian tak tawh THUPIAK gol siksan kawm a hibang vaiguan hon neih theih uh, kipahpih luat ahi. Thugentu khat in, “Ei Pathian pen nambar tam a kipak hipah lou in, a chitak mi tamloute tung a A’ mittu Pathian ahi (Our God is a God of the faithful few, not of numbers!)” ana chih bang deuh in TOUPA deihdan sepkhiakna kong ah a number tam leh tawm ah buai kei ni. Amah deihlam I seem kha mah hiam chih lam ah I ngaihsutna vaksak zaw in “kiseem kha ahi” chih a’ dawnna ahihleh, kipahthu gen kawm in mailam nawt zel ni maw. Hichiang dong hon pitu TOUPA ahi, A' Min thang vangvang hen!
Jesu Khrist kammal khat tawh, report tomkim zou hi ni - "Kuapeuh in Ka naa a sep leh honzui hen; Ka omna ah ka nasempa (sikha) leng a om ding hi; kuapeuh in ka naa a sep leh Pa in amah and pahtawi ding hi” (John 12:26).
31 May 2026 (Nipini) | Upa Dr N Thangkhansiam, NDPN Coordinator –
