Bang Lungput Toh Thilpiak Pe Ding?

Thilpiak lam a kihanthawnna ding a a kizang mun mahmah khat tuh 'Bangkhat laak sangin piak in lukhawng a neizaw' (Nas. 20:35) chih ahi. A kizang mun mahmah dang khat bel 'Pia unla hileh piak na hi ding uh' (Biakna Late 307) chih hileuleu hi. Hiai thuvual tegel in gennop thuktak leh poimoh mahmah neituak ua, thilpiak pedi'a kitouna hoihtak leng hi uh ahi.

A Pilvanhuai:
A tung a kitaklang lungkuai mahmah thuvualte simkhelh / lakkhelh khak ding pilvanhuai i sa mahmah hi. Simkhial / lakhial khale'ng kilawpna diklou (wrong motivation) leh lungput diklou (wrong attitude) toh thilpiak piakkhak theih ana himawk dan ahi. Thilpiak i piakna ziakpen muhkik ding kinepna lungput toh hikei henla, kipahman lametna ziak le hisamkei hen chi i hi. Toupa’n A sawltak, Paul zang a A gen, “A ditnawn di’n leng A kiang ah kua’n ahia thil pe masa?” (Romte 11:35) chiamteh tek ni hang.

A Kideihsakhuai:
Pathian in A tate di’a Khrist tungtawn a hon pomna tanleng, i bangkim piakvekna tham chingkhin lua ahihman in, adang muh ding om nawnkei lehleng, Amah tung a kipahthugenna hiding leh Amah biakna ding a thilpiak (a tamlua chih omthei ngeilou ding) i piak kilawm him ahi. Hiai phulouh itna eite’n itna mah a thukkik ding in kideihsak lua hang.

Banah, Khrist in itna kha (spirit of love) hon piak pansan a hong phulkhia lainatna, veina leh awlmohna taktak toh thilpiak pia hile'ng chih i ki deihsak mahmah hi. Amah, i Toupa mahmah enton in, i thilpiak sangtu ding te it taktak a, amau ziaka sepgim leng khawksa lou a, hamphatna a ngai zaw a, kisuk ek kawm a pia hile'ng chi i hi. I Toupa Jesu'n 'hiai ka sanggamte laka aneupen tunga na hih / hihlouh uh kei tunga hih / hihlou nahi uh' (Mat. 25:40 & 45) A chih i dawnna leng hiding in,

Hon it ing e, Nang n'on it masak vang in'
Kalvari sing khros tungah kei n’on leita;
Hon it ing e, ling lukhu Na khuk vang in,
Itlai k'on neihleh, ka Jesu aw, tu hi'
(Biakna Late 119)

Chikawm in thilpiak petheita lehang i kideihsak mahmah hi.