Deihsakna
Ka tunga a thilhoih hih teng teng ziakin Toupa kiangah bang ahia ka piakthuk sam ding? Hotdamna nou ka la ding a, Toupa min ka sam ding hi. Ka thuchiamte Toupa kiangah ka tangtun ding, ahi a mite ma ah (Sam 116: 12 - 14).
Mihing a I hong piankhiak in a-lian a-neu, a-pil a-siam leh a-zawng a-haute kuapeuh ‘deihsakna’ poimoh lou leh deihlou om di’n ngaihtuahhuai lou hi. Himahleh deihsakna kichi ei ut thu leh hon deihsaktu ding va kibawltawm theih mawk leng hilou a, I mel I puam hiam ahihkei leh I nnasep apan deihsakna tan leh ngah hiam/piak chu mihingte etna dan ah ahi. Himahleh hichibang deihsakna leh hamphatnate zaw mihing damsung ngial leng daih lou phetlou in mei hongkai a sawtlou a mang pah bangphet bang ahih dan lung in geelthak leng i chi ahi. Tuate khenlam pek ah Van leh Lei siamtu, Sepaihte Toupa, Israelte Pathian ‘deihsakna’ tuni a eite’n I tan hampha lua hilou i hi hiam maw, tua in tangtawn daih hiven!!
Nam lian leh thupi zawte, a pil leh siam zawte teel masa zawlou a, a tualniam belamchingte tangthupha puangzak dia a teel banga tuni a eite leng gospel puangzaktu leh amah theihpihtu dia hong teel leh a deihsakna i tan thupi in lamdang lua hi. Unau, ngaihtuah mah dih hiai deihsakna tangtawn daih Khrist Jesu tawn a i biak Pathian hon piak deihsakna kha leh taksa a tangte i hih manin thupi lua hi ,Halleluijah Amen. Unau, hiai deihsakna i tang taktak na hia, ki ngaihtuah ni maw.
Testimony apat: Deihsakna pansan a i kikup lai in, kei personal testimony apat hon gen zek leng; ka sepna kumpi sorkal nna apat superannuation la a kaal-khat/kaal-nih sunga paikhe mai ding a ka omlai in, ka senior most Officer pa un a office ah hon sam a, pension pai ding na hih leh chi a future plan hiam thu vantang hon kikuppih mai dia ka lamet lai in tangpan louhna lampang takah hichi’n hon gen hi ….. “ke’n pension pai dia hon phal nailou ka hi, pai nailou in kum 2 bek sem lai in, sum-le-pai zonna haksat banah na zi leh tate etkolna ah hong nuam tuan ding ka gelna ahi” ahon chi hi. Ke’n leng full pension a ka pai theih leh a hoihpen himailou hiam chi a ka gen hangin a kimin zoukei a, deihsakna thu hoih tampi leng hon gen zawmah lai hi. Hichibang deihsakna kampau ka zak patna ahi a, lamdang bang kasa hi. Tua hun lai in ka lungsim in, Eh! Hiai zaw a lamhilhtu/pitu om ahi, hiai zaw TOUPA NNASEP AHI chih ka lungsim ah hong lang hialhial a, ke’n leng thu gen tam lou in nang chih dandan, nang thuthu himai tave chi’n ka kikhen uhi. Phetlou in postingna leh ta-le-nau etkolna toh kisai a hoihzaw/naizaw leh chutti chihte hon hihsak vek hi. Hiai ko’n gen nasan ahihleh ka sep zomtouh a thupi hizawlou in DEIHSAKNA KA TAN pen ahi thupi leh lamdang ka sak maw….(Jesu Nang Vang hi). Tangte lam ah ka mit ka suantou ding a; koi a kipan in ahia panpihna ahong tun ding? Hon panpihna tuh TOUPA lei-le-van bawlpa apan in ahong tung ding hi (Sam121: 1-2) ana chi hi. Hiai nitak/hun chu salam leh khalam a deihsakna tang a, lim-le-lawm a kei kia hilou, a subordinates (officer) teng in leng hon kipahpih siausiau vanglak man un kipak takin ka om hi. ‘Aw Toupa hoih dan chiam him dih ua’ Sam 34:8 a kigelh pen kei leh ka inn kuanpihte’n kana chiam toutou ua Toupa min ka phat ahi.
Lam khat ah ka en a, a zekai ngeilou Toupa’n ka thumna hon dawngna ahi ka chi a, pension ka pai khit chiang’ na gam nnasepna thilpiak leh thohlawm ah tamsem a ka pan theihna di’n ka sep ding hon pia in aw chi in Toupa kiang ka ngen a… tua ka ngetna Toupa’n line-khat in (saulou leh ki-thak pat ngailou) a hon napi/dawng ahi tave ka chi a Toupa thupina ka pia ahi, tua bangin ke’n leng Toupa gam ah ka thuchiam Amah vangin ka subuching theita hi. Hallelujah Amen. Ka tunga a thilhoih hih tengteng ziakin Toupa kiangah bang ahia ka piak thuk sam ding? Hotdamna nou ka la ding a, Toupa min ka sam ding hi. Ka thuchiamte Toupa kiangah ka tangtun ding, ahi a mite ma ah (Sam 116: 12 - 14).
Tuni’n u-le-nau, nu-le-pate aw, Toupa hehpihna vangin a tamzawte Delhi ah innkuan in sepna hoih taktak nei in I om ua, tua i sepna mun ah bangchi’n i seppihte (colleagues) toh relationship i nei a le, a deihsakna uh tang hi in na kithei hiam? Phetlou in i department a senior pente toh bang cordial tak leh mutual understanding hoih taka build up thei in i om hiam? A ziak chu maw tua bang nuam in manpha a, tuate’n i nnasepna ah hon hanthawn (motivate) in kipak leh lamzang takin a nuam/haksate awl-awl in ki-overcome thei hi. Na thil hoih hihte uh a mu ding ua, na pa uh van a om a pahtawi thei ding uhi (Mat 5:16) chih mangngilh lou in thilhoih hih chimtak kei ni.
Deihsakna manpha leh deihhuai ahihlai in hon deihsaktu i theihchet poimoh petmah hong suak hi. Tuni’n, bangchi bang hinkhua nuam leh haksa a om i hia chih kitheihpih kei mahle hang haksatna leh challenges tuamtuam eimah level chiat ah i na tuak chiat ding uh chi le’ng a khial lawmlawm di’n gintakhuai lou hi. Etsakna di’n Innsung etkolna ah, nupa kal ah, nu-le-pa leh tate toh kal ah, i nnasepna mun ah, i siamsinna ah leh sum-le-pai haksatna ah. Hiai tengteng zaw khovel a om i hi a, khovel mit-hah(k) a i hah(k) sung teng khovel thupina leh a deihsakna in hon khah lou in hon tuam ding mah ahi. Huchih lai in laisiangthou in ‘Mihing thuak theih val khemna himhim na tung uah a tung ngeikei hi. Pathian zaw a muanhuai hi, aman na thuak theih val uh khemna na tuah uh a phal kei ding; na thuaktheihna ding un khemna peuh ah taikhiakna lampi a bawl zaw ding hi’ (1Kor 10:13) ana chi a khamuanhuai in hampha i kisa hi.
