Gualzohna

Toupa hoih hi, ei a ding in! A hoihna leh chitnate a hon taisan ngeilou i Toupa Jesu min in DEW simtute, chibai.

Leitung hinkhua ah, mihing in i phutkhak thil, a hoih leh hoihlou, a nuam leh haksa, nopna leh dahna, lohchinna leh losapna, chidamna leh chinatna, hinna leh sihna, chihte kihelh toutou a, thubaih lou hi. Tua bang a hinkhua haksa mahmah kawmkal ah a hong voukhe mahmah mi hong om zelzel a, tua bang mite; bang a chih chiang a hong voukhia leh minthangkhia uh ahia? Amau haksatnate tuaklou ahi ding uam? Miloching leh a hong minthangkhete i muh chiang in noptuak sa in ki-eng chiat mahmah a, ahi ding mah zong ahi. Ahihleh tua bang mite’n tha bangzah pia, bang a chi panlak chiang ua hiai tan hong tung thei uh ahi dia le?

Pathian in mihingte ama’ batpih a a hon bawlte i hi uhi. Tua in i hihtheihdan kibang kim sipsip kei mahleh koihiam khatlam a tuh hihtheihna kiselgu kinei chiat hi. Tua a kiselgu pen mi tengteng a kibang kimlou a, huai mah a kilawmna ahi. Pathian batpih a bawlte i hih man in, kuahiam khat in thilkhat a vou deuh hih utna a neihleh tuh, tua ama’ sung a hihtheihna Pathian in a koih pen khoilian a, kichiltou a, theihtawpsuah a a hong pan poimoh hi.

Sangkah lai a ka Principal-pa un, “Quitters never win and winners never quit,” ana chih zel pen dik mahmah sa ing. A ziak bel laisim a kallak a course zoulou a tawpsante certificate/ diploma kipe lou, haksa sa pipi a pang teiteite kia’n a course zou in, a degree nei hi. Hinkhua himhim a thil khat peuhpeuh a khawlsan, a tawpsan kichite a loching kichi lou in, a gualzou zong kichi theilou hi. Huaiziak in ei gingtute’n thil khatpeuh i hih chiang a Pathian in thupina a tan theihna dingte ahih ding; tuate mah a kuhkal leh chihtakna toh theihtawp i suah ding. Huchi hileh lohching leh gualzou kihithei ding. Midangte’n ei kuhkal leh chihtakna tungtawn a a nna i seppa mu thei ding uh chih hilai hi.

Laisiangthou a i muh Ruth in zong Naomi’ mou ahihna tawpsan thei gige himahleh a lutnalam mah pibawl in, a tekpi, a mou hihpihnu bang in nuse lou in, haksatna, mindainate thuak in pang teitei hi. A taktak in Ruth dinmun en le’ng mihing lam ah lamet ding bei ahi. Himahleh a tekpi’ tung a mohpuakna a neih pen, sihleh sihpih dia a hong kuankhiak a, a thuakmualsuah chiang in, khovel khangthu a mipoimoh penpente lak a khat in hong pangkha thei hi. A sahkhua diklou a kipan sahkho dik hong beel, milem pathiante apan Pathian hing hong beel, minsiat, haksat, thuak poi salou a a tekpi a hong kepna Pathian in phawkpih in, leitung pumpi’n gualzolna a tan theihna dia vanzat manpha suaksak hi. Huaiziak in Ruth’ thuakhatna, kukalna, ginomna, chihtakna leh Pathian a lauhnate ama’ a ding a gualzohna leh mithanna lampi a ana paina ana hi ahi. Simtu unau, lohchin, gualzoh, minthan i chihte’n hon ngak ahi. A man na pe ngap hia?

Ruth in, “Nang khen ding leh nang zuilou a kiknawn ding in hon kunke’n. Na paina peuh ah ka pai dia; na giahna peuh ah ka giak dia; na chiite ka chiite ahi ding ua, na Pathian ka Pathian ahi ding. Na sihna peuh ah ka si dia, huai ah na hon vui sam ding ahi. Nang leh kei sihna lou ngal thildang in a hon khenleh Toupa’n a hihhih in hon hih henla, hiai sang a thupizaw in leng,” achi hi. Ruth 1:16-17