Pathian In Hon Gup Leh
“Huchi in na min lou a, nang hon len ding a kihihhalh kuamah a om kei uh, kou a kipan in na mai na sel ta ngal a, ka thulimlouhnate uh zang in na hon mangsak ta hi” – Isai 64:7
Pathian in a tel, a mite, a thulimlouh chiang un melmate khut ah a pia a, a gawt zel hi. Kisik a Amah a naih theihna ding un ahi, a mite a thuhilh zel. Pathian in a mite hi dingin eite ahon tel a, hiai banga hamphatna thupi zaw koi mah ah a om kei hi. A mite i hih ngal leh Amah I taisan hun in, i muan zohlouh hun in, gawt louh in hon sam kik kei ding hi. A thuhilhna i ngaihsak a poimoh hi.
Mi nin bangin i om vek ta ngal ua, I thulimlouhnate un huih bangin ahon mutmang zel hi chi a Isai 64:6 in ana gen i hi mahmah uhi. Pathian deihdan a hin i tasam ua, Toupa muanna i tasam ua, Toupa lauhna leng nei nawn lou in eimah lampi tuam chiat ah pial in, eimah punna ding ahih nak leh poisak leng i nei kei uhi. Thil hoih bang hi a, thil hoihlou bang hi hiam chih leng i khenkak thei nawn kei uhi. Eimah hoih sak bang chiat un i khosa ua, i gamtang ua, Toupa kihtakna i tasam petmah uhi. Laisiangthou sim limsak ni, huai ah thil hoih, hoihlou i mu ding hi. Pathian in hoih leh dik a chihte hoih leh dik hi a, hoihlou leh diklou a chihte hoihlou leh diklou himai hi. Bangziakin, khovel leh a sunga om teng, khovel pua a omte tanpha in, thil tengteng……’its not about us, its about God’ ahi hi.
Pathian lau in, a thu limsak in, a min zumpih kei ni. Toupa i Pa uh ahi a, a bellei i hi ua, ei hon velpa Amah ahi a, huchi in i vek un Amah khutsuak i hi uhi (Isai 64:8). I kipah in, i mangbat un Amah gamlat lou in, Amah i zuan ding uhi. Amah sangin khovel vaihawmte bang i lau zaw kha ding uh chih a lauhuai hi. I galte’n gup ding zong in sahkhua vai in kaihlut sawm mahle uh i lau kei ding uh. I pompih zaw dia, i lam ah Toupa i Pathian i kailut zaw kei dia mo? Pathian galdouna i hisak lel kei ding maw….? Lauthawng leh gumtu ding zong in, thuneitute belh bawl in hun dang a i hih uh hi khollou tricolor flag bang mun teng ah i tawi uh, i taak uh, i kaihpalh zezen uh kha. I muan Toupa muanglah deuh sek mah zaw i hih hun uh om eive maw, na chi uhia? Tuni’n kua maipha a i zon ding uh? Toupa’n hon gup leh kua’n hon zou dia?
A mi, Israelte galdouna leh a vualzoh dante uh thei chiang dingin Laisiangthou sim tam zoulou hihang. Mi tawm ziak, galvan hoihlouh ziak, sepaih neih tawm zawk ziak khawngin a vuallel uh hia? Pathian in a mite a panpih dan ‘mak’ hi. Mak-a-mak hitop mai ahi, lamdang taktak hi, divine intervention/miracle mah ahi. Thil hitheilou di, la’h hi si, Laisiangthou ah muh ding tam peuhmah e. Laisiangthou ah i kinga taktak hia chih lampang kivelphat hun hi zaw hi. “Toupa aw, heh kenla, ka thulimlouhnate uh leng tangtawn in thei gige ken, hehpih in hon en inla, ka vek un nangmah mite ka hi uhi (Isai 64:9) chi in Toupa kiangah thum ni. I thulimlouhnate uh thupha tawi in, Amah a muanna i koih ngam zoh chiah louhnate uh koihkhia in, Amah kiangah kik ni. Ama’n “lungsim a kisik tuntunte en zaw ahi (Isai 66:2b). Pathian lungtuak in om peuhmah phot ni. Amah muang sim, muang taktak ngam chiah lou bang zel, Pathian sanga lauh zawk neih hun tam lua hi maw. Pathian thu i zak thohte khawngah i kinga a, muang zoulou kha sek hihang. Laisiangthou simsim ni hang, ni teng in sim ni hang, huchi’n Toupa thupina I mu semsem ding a, thil hithei dia I koihlouh, la’h hithei i mukhe zungzung ding hi. Laisiangthou a kigen Pathian, tua eite biak Pathian mah ahi.
“Pathian in hon gup leh kua hiam hon zou thei ding (Bkna Late 401); Pathian ei lam a a pan leh kua’n ahia hon zou thei ding? (Rom 8:31b).
