Suakta Maw Koltang?
India gam suahtakna leh zalenna koppih in minam a simtham louh a kichi sek eite tanpha utut gen thei in, biakna khatpeuh nei thei in, sepna khatpeuh zong leh sem thei dia om leh sem a bawlte i hi. A huchihkhak louh chia'n leng zalentak a hang lailai thei zomah. I siamna-pilna in a daih nakleh i sep-le-bawlna lampeuh a tungnungpen tun theihna tanpha dalna omlou leh thil hithei gam ahihna khat leng om hi. Hamphathuai i sa chiat thou ding uh.
Tua i chih hang in thilteng a kiching a, a pai ding bang in a pai diandian a, haksatna a omkei chihna bel hi hetlou hi. Tua a kisamte lam i etleh muhtheih adim-aha in om veve hi… Himahleh ei kia tuah leh phutkhak hisam lou. Nam tawmte lak a tampen, lukhu ngou khu a dakchiam hun teng a khupboh gigete' dinmun bang tuh se lua hi sam, ei toh tehkakvual bel hilou. Ban ah, a changkang zaw nam lian zaw sakhua biakna kibang i chihte’n leng haksatna tuah nei veve un, ei namtomte lak sang mah in amau’ lak ah kideidanna uang mahmah.
A suakta gam khat tuh hi ve sam, hilehleng zalenna nei hetlou gamdang tampi om. India kimvel a gam lian leh neute enkual dih - tua gamte khatpeuh a omkha hita lehang adiak in ei gingtute’ dinmun ding, ahihkeileh tua gamte a gingtu omsun, India sang a leng percent tawm zaw a chiamteh theih gam ngenta ahi uhi. Tua gamte ah bang i mu a chih ngaihsut tham hi. Khosakna, hauhsakna, khantouhna leh kitaitehna lam chituamtuam ah India mallam khung a gampeek lian dengdong khat kia chihlouhsiah India sang in tuantual zaw ahi vek uhi.
Gammitna toh kisai in ut-le-utlou a i tenna gammi hihna lai i neihnasun a mikhual dan a omden, intek thei mahmah lou, utbawl lou zomah dan a kiposiah nilouh theih bang hi. Tua ahih dungzui in kivaihawmna paidante lah ei biakna/mimal tak a doudalna dan ngen a ngaikha dek zezen chih bang leng om thei. I tenna gam adia hunbi/ni poimoh (ID/RD)-te natan a neitu deuh om bang a ngaihsun. Ni khat inn a puanlap khai ding bang leng ngaihsak ut khollou, kuate biakna zuihna dan tanpha a koihkha dek mawk. Huchi danlam a enlou in ki-inteksak ki-neitusak tak in om thei hilehang tuitum zawkna lam tuamtuam om thei ban ah ngaihtuahna mah leng tawldamhuai zawkha ding… Khovel khantouhna lam tuamtuam ah leng a kigendan hi vek samkei mahleh a niamse lua bel hi samlou hi.
Tua ahih man in, India suahtakna sung a zalenna zangkhial lou in hamphatna om bangbang intektak leh neitu hihna lungput toh hinkhua i zat ding mah hikha ding hi. Hiai salam ki-ukna a suahtakna in i khalam sahkhua a leng zalentak a gamtat-khosak theihna hon tun ahih man in. Gam khenkhat suakta hinapi khalam biakna, ngeina, tawndan leh chiindan tuamtuam ah zalen hetlou phing tam hi. Tua bang suahtakna buching hithei lou gamte a koihkhak a i omlouh tuh a hampha kihi zaw ding hi. Inde gam a i omkhak (omkha lou dektak) vangpha i kisa hia, vangsia?
