Young Couples’ Seminar (YCM) 2025

EBCC Delhi in year plan a tel, MENTORING AND DISCIPLING SEMINAR, 22 Feb 2025 a neih zawh ahihnung 22 Mar 2025 (Kiginni) in YOUNG COUPLES’ SEMINAR (YCM) biakinn mun mah ah neih zom ahi.

"Kitenna pantu Pathian' geldan leh Haksatna palkhak hun a Khannelh/ Palmualsuah didan (God's Design of Marriage and Growing Through Adversity) chih thupi pansan in Pastor B Nelson Thang Khan Lal, Pastor, ZCF Delhi in sinsakna kiching pia. Kum 10 leh huai sanga kum tawmzaw kitengta nupa tha-hatlaite adi'a gel hi a, mi 50 paikhawm uhi - BIAL 1na apan: 19; 2na apan: 15, leh 3na apan: 16. TOUPA hoih hi.

Pastor Nelson in PPT tawh panga a genna ah: "Khristian kitenna pen 'contract' hilou in 'covenant' hizaw. Leitunga pawlpi hoihbukim (perfect) omlouh mah bang in, nupa hoihbukim ki-om lou hi. Khrist in hon it leh ngaihdam banga ki-it & kingaidam dam nupa hih touhtouh poimawh. Ngaih, nang leh Tou Jesu tawh i om chia'n sapna dang bangmah om nawnlou… Laphuaktu'n ana chih, chi kha ngel ahi" chi in mipite, laa pite pina tawh hon sakpih ziahziah.

Pastor Nelson in a gen khak, point dang khenkhat ahihleh -

• Sermon piak di kisakkholhna ka neih chia'n, a point teng bek, ka lawinu ma ah genkhe masa zel ing, ka lawinu ngaikhetu 'mipi' a pang masa. Huchi'a, a paisuakte pulpit apan gen zel. Tuni a k'ong zat PPT te zong ka lawinu hong bawlsak hi ei..
• TOUPA in ganhing chi tuamtuam, a kopkop in piangsak, A' minte uh Adam in phuak… Tua khit chiang in, Adam hong giautau pian, koppih bei hive'n! Mihing lungsim theisuak Pa in Adam koppih di (a nakguh apan a lakkhiak) "numei" pia - Pasal & Numei. Hiai pen Khristian kitenna kingakna hi a, hiai paw-lam kitenna, neih kibang kiteng chih mawk khawngte mihing phuahtawm vive hi (Matt 19:4-5, Mark 10:6).
• Khristian kitenna a tuamna nawn bel, hunbikhiahnei kitenna (contract marriage) himawk lou a, Pathian min a kichiamna (covenant in the Name of God), sih tawdong daih pumkhat (1+1 =1) suahna hidan ahi.
• Tua man in "Na kichiamna thei gige in (Always remember your vow)" a kichih. Bek tham lou in, a Pankhetu in hoih lua (very good) a chih, tehpih di omlou (unique & incomparable) hi a; tua tungtawn a Pathian lau khang (Godly generation) apian di A' geldan ahi.
• Ii innsung leh gamsung siatna awlmawh thu i gen chia'n nnkuan a kik di i gen sek uh, a sia ka chi kei. Ahizong in, tutung parenting seminar hilou Couples' Seminar di'a ka kisakkholh lai in i kikna di tak innkuan chih sang mah in nupa kibulpatna, nupa hinkhua hizaw ahi chih muthak ing. Nupa kal dik leh, Pathian lau tuak nupa hile'ng innkuan kivaipuakna hong dik di'a, innkuan dik in khawtang kipawlna (society) dik gahkhe di na hidan ahi.
• Haksatna i tuahte ei mun ah gik chiat ei maw. Nupa in TOUPA' deihdan zongkhawm thei peuhmah le, a venglah di omlou hiveh aw (Pau 3:5-6, 24:3, Jak 1:5, 5:16, Nas 18:1ff). Pate'n i zite i bawl (treat) dan, zite'n i pasalte i bawldan, i tate sinsak sak na kihimawk. Ki-enpha ni. PILVANG ni.
• Nupa, i buaina & haksatnate kineu muhsak (kisimmawhsak) louh di, damdam a kingaihkhiaksak leh kituklut tuah (listening & submitting one another) poimawh tawntung hi (Jak 1:19).

Note: Hiai ni, free flow seminar a pai di, productive theipen ahih di deihna tawh video coverage bawl hilou hi.